Meri dastaan sunana

Mera sab bura bhi kahna par accha bhi sab batana,
Mai jab jau is duniya se to meri dastaan sunana.

Ye bhi batana ki kaise samundar jeetne se phle mai hazaaro baar choti choti nadiyo se hara tha.
Wo ghar wo zameen dikhana, koi magroor jo khe to shuruwat meri jarur batana.

Batana safar ki dushwariya meri,
taki koi jo meri jaisi zameen se aaye,
Uske liye nadi ki jhaar humesha choti hi rahe
aur samunder jitne khwab unki aankho se kabhi jaye nhi.

Par unse meri galtiya bhi mat chupana,
koi puche to bta dena ki kis darje ka nakara tha mai.

Kah dena jhootha tha main, batana kaise jaroorat pe kaam na aa saka,
vaade to kiye par nibha na saka;
Intekaam saare pure kiye par kuch ishq adhure rahne diye.

Bta dena sabko ki main matlabi bada tha,
har bade makaam pe tanha hi khada tha.

Mera sab bura bhi kahna, accha bhi sab btana;
Main jab jau is duniya se to meri dastaan sunana.

Azad Zee

Koi Tumse Pooche Kaun Hoon Main

Koi Tumse Pooche Kaun Hoon Main,
Tum Keh Dena Koi Khaas Nahi.

Ek Dost Hai Kaccha Pakka Sa,
Ek Jhoot Hai Aadha Sacha Sa.
Jazbaat Ko Dhaake Ek Purda Bas,
Ek Bahana Hai Acha Sa.
Zindagi Ka Ek Aisa Saathi Hai,
Jo Dur Ho K Bhi Pass Nahi.

Koi Tumse Pooche Kaun Hoon Main,
Tum Keh Dena Koi Khaas Nahi.

Hawa Ka Ek Suhana Jhonkha Hai,
Kabhi Nazuk Toh Kabhi Tufaano Sa.
Shakal Dekh Kar Jo Nazrein Jhuka Le,
Kabhi Apna Toh Kabhi Begaano Sa.
Zindgi Ka Ek Aisa Humsafar,
Jo Samandar Hai,
Par Dil Ko Pyaas Nahi.

Koi Tumse Pooche Kaun Hoon Main,
Tum Keh Dena Koi Khaas Nahi.

Ek Saathi Jo Unkahi Kuch Baatein Keh Jaata Hai,
Yaadon Me Jiska Ek Dhundhla Chehra Reh Jaata Hai.
Yunh Toh Uske Na Hone Ka Kuch Ghum Nahi,
Par Kabhi-Kabhi Aankhon Se Ansu Ban Ke Beh Jata Hai.

Yunh Rehta Toh Meri Duwaoo Main Hai,
Par In Aankho Ko Uski Talaash Nahi.

Koi Tumse Pooche Kaun Hoon Main,
Tum Keh Dena Koi Khaas Nahin...

Azad Zee